දළදා මාලිගාව ඉදිරිපිට මාර්ගය විවෘත කිරීමේ සූදානමක්

මහනුවර දළදා මාලිගාව ඉදිරිපිට දැනට වසා ඇති මාර්ගය ඉදිරි කාලයේ දී සැහැල්ලු වාහන සහ ජනතාවගේ ගමනා ගමනය සඳහා යළි විවෘත කිරීමේ සැළැස්මක් පවතින බව විදේශ රැකියා ප්‍රවර්ධන හා සුභසාධන අමාත්‍ය කෙහෙළිය රඹුක්වැල්ල මහතා පවසයි.දැනට වසා ඇති මෙම මාර්ගය හේතුවෙන් මගී ජනතාවට මහත් දුෂ්කරතාවන් මතුව තිබේ.
අමාත්‍යවරයා සඳහන් කර සිටියේ දළදා මාලිගා ගොඩනැගිල්ල ජාතික වස්තුවක් වන බැවිනුත්, මාලිගාවට එල්ල වුණු ත්‍රස්ත ප්‍රහාරයත්, මාලිගාව කබෝග් ගලෙන් නිර්මාණය වීම නිසා එහි පවතින තතත්වයත් සැලකිල්ලට ගෙන අදාළ මාර්ගය වසා දැමුණු බවයි. නමුත් ඉදිරියේ දී බරවාහන ගමනා ගමනය සහ තවත් සීමා සහිත නීති කිහිපයක් සමගින් මෙම මාර්ගය යළි ජනතාව වෙනුවෙන් විවෘත කිරීමේ අදහසක් බවතින බව රඹුක්වැල්ල මහතා සඳහන් කරයි. එමෙන්ම ඇමතිවරයා පැවසුවේ වසර 2010 මහනුවර අධිවේගී සංවර්ධන වැඩපිළිවෙල යටතේ දිස්ත්‍රික්කයේ සංවර්ධන ක්‍රියාදාමයන් රැසක් ක්‍රියාවට නැංවීමට ද නියමිත බවයි. එම වැඩපිළිවෙලට අනුව දන්ත ධාතුන් වහන්සේ වැඩ සිටින මාලිගාව ප‍්‍රදේශය පූජනීය ප‍්‍රදේශයක් බවට පත් කිරීම සිදුකෙරේ. මේ අනුව ප‍්‍රදේශයේ පරිසරය සුරැකීම හා වාහන තදබදය අඩු කිරීමට ප‍්‍රමුඛත්වය දෙයි. ඒ සඳහා මුළු නගරයේ ප‍්‍රධාන ගොඩනැගිලි සියල්ලම පල්ලෙකැලේ හා කුණ්ඩසාලේ ප‍්‍රදේශවලට ගෙනයාමට සැලැසුම් කර තිබේ.