සිසුන් ඇතූළත් කිරීමේදී අමතර මුදල් ගත්තා නම් වහා ගෙවන්න - අධ්‍යාපන ඇමති

පාසල්වලට සිසුන් ඇතුළු කිරීමේදී පහසුකම් හා සේවා ගාස්‌තු සහ පාසල් සංවර්ධන සමිති අරමුදලට අමතරව මුදල් අයකරගෙන තිබේ නම් ඒවා වහාම ආපසු ගෙවීමට විදුහල්පතිවරුන්ට නියම කරන බව අධ්‍යාපන ඇමති සුසිල් ප්‍රේමජයන්ත මහතා ඊයේ (08)දින පාර්ලිමේන්තුවේදී ප්‍රකාශ කර සිටියේය.
ජ.වි.පෙ. කුරුණෑගල දිස්ති‍්‍රක් මන්තී‍්‍ර අනුර කුමාර දිසානායක මහතා, කොළඹ ප්‍රධාන පෙළේ පාසල් දෙකක්‌ රුපියල් 5760ක්‌ හා රුපියල් 3600ක්‌ බැගින් පහසුකම් හා සේවා ගාස්‌තුවලට අමතරව විදුලි ගාස්‌තු, ආරක්‌ෂක ගාස්‌තු, ඇගයුම් ගාස්‌තු, පුස්‌තකාල ගාස්‌තු, පැවරුම් ගාස්‌තු ලෙසින් මුදල් අයකරගෙන ඇති බව පවසමින් අසන ලද ප‍්‍රශ්නයට පිළිතුරු දෙමින් ඇමතිවරයා මේ බව සඳහන් කර සිටියේය.
මේ සඳහා අද (09)දින සියළුම විදුහල්පතිවරුන්ට නිල වශයෙන් දැනුම් දෙන බව කී ඇමතිවරයා චක‍්‍රලේඛයට පටහැනිව අතිරේක වශයෙන් මුදල් අයකරගෙන ඇති පාසල් විගණන පරීක්‌ෂණයකට යොමු කරන බවද, ප්‍රකාශ කර සිටියේය.