ටී.ආර්.ඕ. සභාපතිගෙන් ප්‍රශ්න කිරීමට අවසර

ටී.ආර්.ඕ. හෙවත් දෙමළ පුනරුත්ථාපන සංවිධානයේ සභාපතිවරයා සහ තවත් පුද්ගලයෙකු රැඳවුම් නියෝග මත ප්‍රශ්න කිරීමට කොළඹ ප්‍රධාන මහේස්ත්‍රාත් අධිකරණය අද අවසර දුන්නේය.
විදේශීය මුදල් එක්රැස් කර ඒවා එල්.ටී.ටී.ඊ. සංවිධානයේ ත්‍රස්තවාදී කටයුතු සඳහා යෙදවූ බවට මෙම සංවිධානයට එරෙහිව තවදුරටත් පරික්ෂණ සිදුකරන බව අපරාධ පරික්ෂණ දෙපාර්තමේන්තුව අධිකරණයට දැනුම් දුන්නේය.
මේ අතර, අදාළ පරික්ෂණ කටයුතු සඳහා ප්‍රශ්න කිරීමට අවශ්‍ය තවත් පුද්ගලයන් 7 දෙනෙකුට අධිකරණය හමුවේ පෙනී සිටින ලෙස නොතීසි නිකුත් කර තිබුණත් ඔවුන් අධිකරණය හමුවේ අද පෙනී සිටියේ නැත.
කොළඹ අතිරේක මහේස්ත්‍රාත් ප්‍රහර්ෂා රණසිංහ මහත්මිය මෙම පුද්ගලයන් 7 දෙනාට නැවතත් අධිකරණයේ පෙනී සිටින‌ ලෙස නොතීසි නිකුත් කළාය.