පන්දුවාර 20/20 තරගාවලියේ අවසන් තරගයට ශ්රී ලංකාව ඊයේ සුදුසුකම් ලැබුවේ බටහිර ඉන්දීය කොදෙව් කණ්ඩායම ලකුණු 57කින් පරදවමිනි.නොදැවී ලකුණු 96 ක් රැස් කරමින් තිලකරත්න ඩිල්ෂාන්, ශ්රී ලංකා කණ්ඩායම ජයග්රහණය කරා රැගෙන ගිය නියමුවා විය.
ලන්ඩනයේ ඕවල් ක්රීඩාංගණයේ ඊයේ පැවැති දෙවැනි අවසන් පූර්ව තරගයේදී කාසියේ වාසිය දිනූ කොදෙව් කණ්ඩායම, පන්දුවට පහර දීමේ වාරය ශ්රී ලංකාවට පිරිනැමීය.
ආරම්භක පිතිකරුවන් ලෙස පිටියට පැමිණි සනත් ජයසූරිය සහ තිලකරත්න ඩිල්ෂාන්ට මන්දගාමී ආරම්භයක් ලැබුණු බවක් දිස් විය.
නිසි පහර කරා යාමට ඉඩක් නොලද සනත්, සිය සුපුරුදු වේගවත් රටාවට අවතීර්ණ වනු නොහැකිව තරමක් අපහසුතාවකට ලක්වූ ආකාරයක් පෙන්නුම් කළේය.
ඒ අනුව පන්දු 37 දී සනත්ට රැස් කර ගත හැකි වූයේ ලකුණු 24 ක් පමණි.
ටේලර් එවූ පන්දුවක්, උඩපන්දුවක් ලෙස ඩ්වේන් බ්රාවෝ වෙත මුදා හරිමින්සනත් පිටියෙන් ඉවත් වන විට පන්දුවාර 10.3 ක් ගෙවී මුලු ලකුණු සංඛ්යාව 73 ක් විය.
ඉන් අනතුරුව පිටියට පිවිසි නායක කුමාර සංගක්කාර හෝ මහේල ජයවර්ධනට ද අපේක්ෂිත ප්රතිඵල අත් කර ගත නොහැකි විය.
සංගක්කාර ලකුණු නොලබා ද, මහේල ලකුණු 2 ට ද කොදෙව් පන්දු යවන්නන්ට සිය කඩුලු බිලි දෙමින් පිටියෙන් ඉවත් වූහ.
චාමර සිල්වාට සහ ජෙහාන් මුබාරක්ට පිළිවෙලින් රැස් කළ හැකි වූයේ ලකුණු 11 ක් සහ 7 ක් පමණි.
අනෙක් අන්තයේ කඩුලු එකිනෙක ගිලිහෙද්දී තිලකරත්න ඩිල්ෂාන් හුදෙකලාවේ යැයි කිව හැකි තරගයක යෙදෙමින් නොදැවී අගනා ලකුණු 96ක් රැස් කළේය.
අවසන් පන්දුවාර 1.3 දී ඩිල්ෂාන් හා එක්වූ ඇන්ජලෝ මැතිව්ස් පන්දු 4 දී වේගවත් ලකුණු 12 ක් රැස් කරමින් ඩිල්ෂාන් හා තරගයට යම් ජීවයක් එක් කළේය.
ඒ අනුව ශ්රී ලංකාව සිය පන්දුවාර 20 තුළදී කඩුලු 5 ට ලකුණු 158 ක් රැස් කළේය.
ලකුණු 159ක ඉලක්කයක් අතැතිව පිටියට පිවිසි කොදෙව් කණ්ඩායමේ ජයග්රහණයේ අපේක්ෂාව, ඇන්ජලෝ මැතිව්ස් ගේ පන්දු යැවීමෙන් සුනු විසුනු වන ලකුණු පෙන්නුම් කරන්නට විණ.
මැතිව්ස් කොදෙව් පළමු කඩුලු 3 ම බිඳහෙළුවේ ඔවුන්ගේ මුලු ලකුණු සංඛ්යාව 01 ලෙස රඳවමිනි.
ඔහුට ගොදුරුවූ ක්ෂේවියර් මාර්ෂල්, සිමන්ස් සහ ඩ්වේන් බ්රාවෝ ලකුණු නොලබා ම පිටියෙන් ඉවත් වූහ.
අනෙක් කිසිදු ක්රීඩකයකුට හෝ ස්ථාවර වීමට ඉඩ නොදුන් ශ්රී ලංකා ක්රීඩකයෝ,ඔවුන් ලකුණු 9න් මෙපිට සීමාවේ රඳවා පිටියෙන් ඉවත් කළහ.
නායකත්වයේ වගකීම කරට ගෙන හුදෙකලා සටනක යෙදුනු ක්රිස් ගේල් නොදැවී ලකුණු 63ක් රැස් කළේය.
එහෙත් ජයග්රහණය ලැබීමට තරම් එය ශක්තිමත් නොවුණි.
ඒ අනුව කොදෙව් කණ්ඩායම පන්දු වාර 17.4ක් තුළදී සියලු දෙනා දැවී ලකුණු 101 ක් පමණක් රැස් කළේය.
පන්දු යැවීමේදී ඇන්ජලෝ මැතිව්ස් සහ මුරලිදරන් කඩුලු 3 බැගින් ද, අජන්ත මෙන්ඩිස් කඩුලු දෙකක් ද, ඉසුරු උදාන සහ ලසිත් මාලිංග එක් කඩුල්ල බැගින් ද බිඳ හෙළීය.
මෙවර පන්දුවාර 20/20 ලෝක කුසලාන තරගාවලියේ අවසන් තරගය, ශ්රී ලංකාව සහ පාකිස්තානය අතර ලබන හෙට (ඉරිදා) පැවැත්වෙනු ඇත.
