මෙරට මුහුදු සීමාවට අනවසරයෙන් ඇතුළු වී පසුගියදා නාවික හමුදා භාරයට පත්වූ ‘කැප්ටන් අලී’ නෞකාව නැවත හරවා යැවීමට රජය තීරණය කර ඇතැයි ආරක්ෂක ලේකම් ගෝඨාභය රාජපක්ෂ මහතා පවසයි.ටොන් 884 ක ආහාර, බෙහෙත් හා වෛද්ය උපකරණ රැගෙන පුදුමාතලන් දක්වා ඒමට කැප්ටන් අලී නෞකාව කුලී පදනම මත අදාළ නෞකා සමාගමෙන් ලබාගෙන ඇති බව තහවුරු වීමෙන් පසු නෞකාව ආපසු හරවා යැවීමට තීරණය කළ බව ආරක්ෂක ලේකම්වරයා පැවැසීය.
කාර්ය මණ්ඩලයේ 15 දෙනා ද සමඟ කැප්ටන් අලී නැව ආපසු හරවා යැවීමට නියමිතය. දින 3ක් තිස්සේ නාවික හමුදා කළ පරීක්ෂාවලදී ආහාර, බෙහෙත් හා වෛද්ය උපකරණ හැරෙන්නට වෙනත් කිසිදු නීති විරෝධී යමක් හමුනොවූ බව නාවික හමුදා මාධ්ය ප්රකාශක කමාන්ඩර් මහේෂ් කරුණාරත්න මහතා පැවැසීය.
මේ අතර නාවික හමුදා බුද්ධි අංශය කළ පරීක්ෂණ වලදී හෙළිකරගත් කැප්ටන් අලි නෞකාවේ මෙරට නියෝජිතයා වශයෙන් සැකකරන පුද්ගලයකු නෞකාව නාවික හමුදා භාරගත් දිනයේම රහසේ විදේශ ගතවීමට යාමේදී පසුගිය බ්රහස්ප්රතින්දා (04) අපරාධ පරීක්ෂණ දෙපාර්තමේන්තුව මඟින් කටුනායක ජාත්යන්තර ගුවන් තොටුපළේදී අත්අඩංගුවට ගෙන පරීක්ෂණ කරගෙන යයි.
