විදේශිකයින් 6 දෙනෙකු රටින් පිට කෙරේ

මෙරටට අහිතකර අන්දමේ ක්‍රියාවල නිරත වූ විදේශිකයින් 6 දෙනෙකු මේ වසරේ රටින් පිට කළ බව ආගමන හා විගමන දෙපාර්තමේන්තුව පවසයි.
ආගමන විගමන පාලක පී.බී. අබේකෝන් මහතා සඳහන් කළේ, දෙපාර්තමේන්තුවට ලැබුණු පැමිණිලි කිහිපයක් සලකා බලා කරන ලද පරීක්ෂණවලින් අනතුරුව මෙම පුද්ගලයින් රටින් පිටමං කළ බවය.
අදාළ පුද්ගලයින් සම්බන්ධයෙන් ආරක්ෂක අංශ හා බුද්ධි අංශවලින් තොරතුරු වාර්තා වූ බව ද අබේකෝන් මහතා පැවසීය.
එම පිරිස බ්‍රිතාන්‍යය ඇතුළු යුරෝපීය රටවල් කිහිපයකට අයත් පුද්ගලයෝ වෙති.
ආගමන විගමන පාලකවරයා සඳහන් කළේ, මෙරටට පැමිණෙන විදේශිකයින්ගේ ක්‍රියා කලාපයන් සම්බන්ධයෙන් දෙපාර්තමේන්තුවේ විමර්ශන කණ්ඩායම් දැඩි අවධානයෙන් පසුවන බවය.